Murati: Banka Botërore e ka larguar Kosovën nga Lista e shteteve fragjile dhe në situatë konflikti

17:09 | 9 Korrik 2025
E.K

Republika e Kosovës është larguar nga Lista e Shteteve Fragjile dhe në Situatë Konflikti e përpiluar nga Banka Botërore.

Lajmin e ka konfirmuar ministri në detyrë i Financave, Hekuran Murati, i cili tha se pas më shumë se 15 vitesh si shtet anëtar në këtë institucion financiar ndërkombëtar, Kosova ka dalë nga kjo listë.

Sipas tij ky ndryshim përbën avancim të jashtëzakonshëm dhe “i vulos arritjet tona si shtet duke dëshmuar stabilitet institucional dhe qëndrueshmëri ekonomike”.

“Ky lajm i mirë padyshim se do të ketë ndikim pozitiv në perceptimin ndërkombëtar karshi Republikës së Kosovës dhe e rritë besueshmërinë e investitorëve të huaj. Njëkohësisht, kjo dëshmon edhe për bashkëpunimin e shkëlqyer me Bankën Botërore, por edhe koordinimin jashtëzakonisht të mirë në mes të institucioneve vendore si MFPT dhe BQK”, ka shkruar Murati./Arbresh.info