Ish- Sekretari Organizativ i Vetëvendosjes, tashmë kreu i Partisë Social Demokrate (PSD), Dardan Molliqaj, ka reaguar pas dështimit të marrëveshjes për bashkëqeverisje mes Lidhjes Demokratike të Kosovës (LDK) dhe Lëvizjes Vetëvendosje (LVV).

Molliqaj përmes një postimi në Facebook, ka shkruar se për më shumë se dy vjet, këto dy subjekte politike kërkonin rrëzimin e qeverisë dhe krijimin e një qeverie të re.

Sipas tij, VV dhe LDK nuk po duket të kenë asnjë dallim thelbësor nga qeverisja e kaluar.

Ai, ka shkruar se për këto dy parti, po del të jenë më e rëndësishme pozitat, se sa bërja e qeverisë.

Reagimi i plotë i Molliqajt:

Për më shumë se 2 vite, VV dhe LDK kërkonin – me të drejtë – rrëzimin e qeverisë. Për më shumë se dy vite premtonin që për opozitën e atëhershme krijimi i një qeverie të ndryshimit do të jetë shumë i lehtë ngase ata nuk prishen për pozita e për pushtet.

Por në fakt, VV dhe LDK nuk po duket të kenë asnjë dallim thelbësor nga qeverisja e kaluar:

1. Po dëshmojnë që për ta pozitat janë më të rëndësishme se sa temat konceptuale e qeverisëse. Asnjë mospajtim ta zëmë për arsimin, shëndetësinë, pensionet, ekonominë, etj, por mospajtime të patejkalueshme se kush po merr më shumë pushtet.

2. Po e lëjnë të vazhdojë keqqeverisjen e kaluar duke mos rënë dakord në mes vete. Prapë, për pozita e pushtet, po lejojnë që të vazhdojë keqpërdorimi i buxhetit të shtetit nga qeveria në shkuarje.

3. Tash e 3 muaj po e mbajnë Kosovën peng të dëshirës së tyre për pushtet, njësoj siç dikur PDK-ja e mbante vendin të bllokuar për 6 muaj./arbresh.info