Komiteti Punues për Integrim Evropian mbajti sot mbledhjen e radhës, nën kryesimin e ministres së Integrimit Evropian, Dhurata Hoxha, me ç’rast u diskutuan masat afatshkurtra të Programit të MSA-së, të cilat duhet trajtuar me prioritet gjatë vitit 2019.

“Lista e masave në fjalë, mbulojnë 18 kapituj të acquis-së, si dhe Kriteret Politike me Kriteret Ekonomike. Janë gjithsej 66 masa të planifikuara- 42 masa legjislative, 24 masa zbatuese”, ka shkruar Ministrja në rrjetin social.

Postimi i plotë i Ministres Hoxha në Facebook:

“Në takimin e radhës së Komitetit Punues për Integrim Evropian, diskutuam masat në kuadër të Programit të MSA-së për këtë vit të cilat duhet të trajtohen me prioritet. Këtë vit kërkohet zbatim më i mirë i Programit se vitin e kaluar, të paktën 70% të masave të planifikuara, të paraparë me Programin IPA 2 për Mbështetje Direkte Buxhetore për Reformën e Administratës Publike.

Lista e masave në fjalë, mbulojnë 18 kapituj të acquis-së, si dhe Kriteret Politike me Kriteret Ekonomike. Janë gjithsej 66 masa të planifikuara- 42 masa legjislative, 24 masa zbatuese.

Në pjesën e diskutimeve, nga bartësit e përgjegjësive u cekën masat që mund të zbatohen, ato që nuk kanë siguri për zbatim dhe shkaqet e moszbatimit, po ashtu edhe planifikimi për zbatimin e tyre. Punë më dinamike na pret”.