Presidenti ukrainas Volodymyr Zelenskyy pritet të zhvillojë këtë fundjavë një raund të ri bisedimesh për paqen, mes intensifikimit të sulmeve ruse mbi Kievin.

Të shtunën, ai do të marrë pjesë në një telefonatë me liderë europianë, përfshirë presidenten e Komisionit Europian Ursula von der Leyen, ndërsa të dielën do të udhëtojë drejt Floridës për një takim me presidentin amerikan Donald Trump.

Zelenskyy ka deklaruar se plani i paqes me 20 pika është “90% gati” dhe se takimi i së dielës ka për qëllim “ta çojë gjithçka në 100%”. Pikat më të ndjeshme të diskutimit përfshijnë garancitë e sigurisë për Ukrainën, rindërtimin e vendit, si dhe çështjet territoriale që lidhen me rajonin e Donbasit dhe centralin bërthamor të Zaporizhzhias.

Ai ka lënë të hapur mundësinë e një referendumi kombëtar nëse Rusia pranon një armëpushim prej të paktën 60 ditësh.

Ndërkohë, në orët e para të së shtunës, Kievi u godit nga një valë e re sulmesh me raketa Kinzhal, Iskander dhe Kalibr. Kryebashkiaku Vitali Klitschko raportoi pesë të plagosur dhe një zjarr në distriktin Holosiivskyi, ndërsa në rajonin e Brovarit pati ndërprerje të energjisë.

Forcat ajrore ukrainase shpallën alarm ajror në mbarë vendin, duke paralajmëruar për lëvizje dronësh dhe raketash mbi disa rajone. Sulmet detyruan avionët luftarakë polakë të ngrihen në ajër, ndërsa dy aeroporte në juglindje të Polonisë u mbyllën përkohësisht.

Diplomacia e fundjavës vjen pas takimeve të zhvilluara në Miami, ku emisari i Trump, Steve Witkoff, dhe Jared Kushner u takuan veçmas me përfaqësues rusë dhe ukrainas.

Plani aktual shihet si një version i përditësuar i dokumentit me 28 pika të dakordësuar më herët mes amerikanëve dhe rusëve, i cilësuar nga shumë analistë si i favorshëm për Moskën.

Ukraina ka kërkuar garanci sigurie të ngjashme me nenin 5 të NATO-s, por mbetet e paqartë nëse Rusia do t’i pranojë.

Trump, në një intervistë për Politico, tha se pret një “takim të mirë” me Zelenskyyn, por nuk dha mbështetje të drejtpërdrejtë për planin. “Ai nuk ka asgjë derisa ta miratoj unë,” u shpreh Trump.

Nga ana tjetër, zëvendësministri i jashtëm rus Sergei Ryabkov kritikoi Kievin dhe aleatët europianë, duke i akuzuar se po përpiqen të sabotojnë marrëveshjen. Ai tha se propozimi i hartuar me kontributin e Zelenskyyt “ndryshon rrënjësisht” nga pikat e para të diskutimeve mes SHBA-së dhe Rusisë.