Mediat serbe kanë raportuar sonte për një incident të armatosur në fshatin Rastelicë të Kurshumlisë.

Pa e cituar asnjë burim zyrtar, televizionet RTS dhe B92, si dhe gazetat Novosti e Kurir kanë raportuar se bëhet fjalë për ”dhjetëra shqiptarë prerës ilegalë pyjesh” që kanë shtënë me armë automatike drejt policisë, sot në orët e pasdites, dhe më pas kanë ikur me disa traktorë në drejtim të Kosovës.

“Kur kanë parë policinë që patrullojnë zonën, kanë hapur zjarr me automatik, por policia është kundërpërgjigjur. Ndonëse hajdutët e pyjeve kanë ikur me traktorë në territorin e Kosovës, vendi ku kanë prerë pyllin në mënyrë të paligjshme ka qenë një “vërshim” i vërtetë plumbash sepse kanë qëlluar edhe pjesëtarët e policisë dhe hajdutët e pyjeve”, thuhet në raportimin e “Kurir”.

Sipas këtij mediumi, veprime të tilla të shqiptarëve që hyjnë në malet e tyre për të prerë dru ilegalisht ka mjaft shpesh. Rastelica është një vendbanim shumë afër komunës së Podujevës, në anën tjetër të kufirit me Serbinë.

As policia e as ushtria serbe nuk kanë reaguar për të konfirmuar ose pohuar incidentin, që thuhet se ka ndodhur në zonën tokësore të sigurisë./lajmi.net/