Një nga mediat më të mëdha suedeze, “Dagens Nyheter”, ka raportuar për dënimin me burgim të përjetshëm ndaj Naim Murselit, i shpallur fajtor për organizimin e vrasjes së bashkëshortes së tij, Liridona Ademaj.

Sipas raportimit, interesi i mediave suedeze lidhet me faktin se ish-çifti ka pasur edhe shtetësi suedeze, ndërsa Murseli është rritur në rajonin e Bohuslän në Suedi dhe ka jetuar mes Suedisë dhe Kosovës për disa vite.

“Dagens Nyheter” shkruan se Murseli është dënuar me burgim të përjetshëm për urdhërimin e vrasjes së bashkëshortes së tij, ndërsa citon edhe reagimin e familjarëve të Liridonës, të cilët theksojnë dhimbjen për humbjen dhe të ardhmen e fëmijëve të saj.

Mediat suedeze gjithashtu rikujtojnë detaje nga ngjarja e rëndë e nëntorit 2023 dhe procesi hetimor që çoi në identifikimin e të përfshirëve në rast.

Sipas dokumenteve gjyqësore të cituara nga media, çifti kishte filluar procedurat e shkurorëzimit në vitin 2019, por më vonë kishin ndryshuar vendim. Raportimet përmendin gjithashtu se motivi i mundshëm i krimit lidhet me çështje financiare, përfshirë një sigurim jete në vlerë rreth 280 mijë euro.

Po ashtu, thuhet se fëmijët e çiftit janë vendosur në kujdestari në Suedi.