Ministri në detyrë i Punëve të Brendshme, Xhelal Sveçla ka bërë të ditur se është kthyer në pronësi të komunës së Mitrovicës së Veriut objekti që ishte në shfrytëzim nga strukturat paralele serbe.

Me anë të një postimi në Facebook, Sveçla tha se objekti ishte në shfrytëzim nga e ashtuquajtura Zyrë për Sport, Rini dhe Shërbime të Specializuara, përcjell Arbresh.info.

“Hapësirat publike të uzurpuara prej dekadash nga strukturat paralele të Serbisë po kthehen në shfrytëzim të komunave dhe institucioneve tona, të Republikës së Kosovës. Në vazhdën e mbylljes së secilit paralelizëm institucional sot u kthye në pronësi të komunës së Mitrovicës së Veriut objekti i cili deri tash ishte shfrytëzuar nga strukturat paralele, përkatësisht nga e ashtuquajtura Zyrë për Sport, Rini dhe Shërbime të Specializuara”, ka shkruar Sveçla.

“Po ashtu, në një aksion ngjashëm është zhvilluar te stacioni i pompave të ujit në fshatin Suhodoll të Mitrovicës së Veriut. Epoka e tolerimit të zhvillimit të paralelizmave përballë institucioneve tona ka perënduar dhe nuk kthehet më. Në çdo cep të Republikës sonë ka rend e ligj dhe institucione që janë në shërbim të të gjithë qytetarëve tanë”, tha tutje Sveçla./Arbresh.info