Ministria e Arsimit do të ndajë edhe kësaj radhe bursa për studentë të dalluar. Por për dallim nga vitet e kaluara, këtë vit studentët e Fakultetit të Edukimit në Universitetin e Prishtinës nuk do të kenë mundësi të aplikojnë për një asistencë të tillë financiare, pasi që Ministria e Arsimit i ka larguar nga lista e përfituesve.

Ky vendim po kundërshtohet nga studentët e këtij fakulteti të cilët tashmë kanë drejtuar ankesën në Ministri, raporton T7

Numri i nënshkrimeve veç po shtohej gjatë së mërkurës.

Studentët e Fakultetit të Edukimit, përmes një ankese, po e shprehnin pakënaqësinë e tyre në lidhje me një vendim të Ministrisë së Arsimit.

Nga ky institucion, për dallim nga vitet e kaluara, kanë vendosur që në listën e studentëve që mund të aplikojnë për bursë, të mos përfshihen ata të Fakultetit të Edukimit.

E për ta një vendim i tillë është shqetësues.

Mos përfshirja e tyre në listën e studentëve me të drejtë përfitimi të bursës, po cilësohet demotivuese.

E interesimi për t’iu bashkangjitur kësaj ankese, duket të jetë shumë i madh.

Në vendimin e Ministrisë, thuhet se këto bursa ndahen duke u bazuar në ligjin e arsimit të lartë, prioritetet nacionale dhe interesat strategjike të vendit.

Ndonëse këtë problem e kanë studentët e fakultetit që ata drejtojnë, nga dekanati i Fakultetit të Edukimit, nuk janë përgjigjur për këtë çështje.

Me vendimin e Ministrisë së Arsimit, nga lista e përfituesve të bursës janë larguar edhe ata të Fakultetit të Arteve dhe Edukatës Fizike.

Ndërkohë asistencë financiare mund të fitojnë studentët e bujqësisë, fakultetit të shkencave matematiko-natyrore, mjekësi e përgjithshme, farmaci dhe stomatologji, teknik dhe studentët e fakultetit të shkencave të aplikuara.