Ministri i Mbrojtjes, Ejup Maqedonci ka thënë se me sukses të lartë është realizuar ushtrimi fushor “Ujku i Çeliktë” i Forcës së Sigurisë së Kosovës.

Me anë të një postimi në Facebook, Maqedonci tha se në këtë ushtrim morën pjesë mbi 1 mijë ushtarë, përcjell Arbresh.info

“Sot me sukses të lartë, Forca e Sigurisë së Kosovës zhvilloi ushtrimin fushor “Ujku i Çeliktë”, më të madhin të realizuar ndonjëherë nga ushtria jonë, me mbi 1000 ushtarë pjesëmarrës duke dëshmuar shkathtësi dhe përgatitje të jashtëzakonshme në aspektin e organizimit, ndërveprimit dhe taktikave luftarake”, tha Maqedonci.

“Prezent në këtë ushtrim të rëndësishëm ishte edhe Presidentja e Republikës së Kosovës, Vjosa Osmani, Kryeministri i Republikës së Kosovës, Albin Kurti, komandanti i FSK’së gjenerallejtënant, Bashkim Jashari dhe përfaqësues nga NATO, shtetet aleate, akter institucional dhe zyrtarë tjerë ndërkombëtar”, tha tutje Maqedonci.

“Me anë të këtij ushtrimi gjithashtu është validuar regjimenti i dytë i komandës së forcave tokësore të cilët janë në gjendje të kryejnë detyra të veçanta dhe komplekse me efikasitet të lartë”, tha ministri Maqedonci./Arbresh.info