Kryeprokurori i Shtetit, Aleksandër Lumezi ka thënë se së shpejti në Kosovë do të ndodhin rastet e para të kompensimit të viktimave të krimit.

Lumezi tha në hapje të “Javës së Viktimave të Krimit” se si kryeprokuror i shtetit shpreh angazhimin e plotë në misionin e vazhdueshëm për të mbrojtur viktimat e krimit, shkruan arbresh.info.

“Si Kryeprokuror i Shtetit dua t’i siguroj të gjithë qytetarët se do t’i ndërmarrim të gjitha veprimet e nevojshme që viktimat e krimit t’i trajtojmë më respekt dhe dinjitet. Roli i prokurorëve është thelbësor në sundimin e Ligjit dhe administrimin e drejtësisë. Së shpejti do të kemi dhe rastet e para që do të përfitojnë sipas Ligjit për Kompensimin e Viktimave. Viktimat e krimit janë një kategori e cila duhet të ketë mbrojtje dhe përkrahje të nevojshme”, ka thënë Lumezi.

Ai ka kërkuar nga prokurorët që të bashkëpunojnë sa më shumë me viktimat e krimit sepse vetëm në këtë mënyrë do të luftohet e keqja./arbresh.info/