Kryetari i Drenasit, Ramiz Lladrovci, ka komentuar takimin e sotëm të thirrur nga Ambasada e Shteteve të Bashkuara të Amerikës në lidhje me çështjen e Asociacionit, në të cilin takim i pranishëm nuk ishte kryeministri Albin Kurti.

Sipas Lladrovcit, kjo mungesë është brengosëse dhe sinjal shqetësues.

“E kishin pase pyet njërin, o Bac, kush vetet në shpinë tuaj më së shumti, e ai i përgjigjet, të gjithë ngapak, veç Baci hiç”, shkroi ai.

Lladrovci tha se kryeministri duhet të dëshmohet më burrështetas se kaq.

Postimi i plotë:

Mungesa e Kryeministrit në takimin e ftuar nga Ambasada Amerikane për çështjen e Asociacionit është brengosëse

Sipas sistemit tonë juridik, roli dhe përgjegjësia e Kryeministrit është shumë e rëndësishme, e me theks të veçantë në fushën e negociatave me Serbinë, e ka dhënë verdiktin edhe Gjykata Kushtetuese, sipas të cilës procesi negociator është çështje/përgjegjësi ekskluzive e Kryeministrit.

Mospjesëmarrja e Kryeministrit në takimin e sotëm të organizuar nga Ambasada e Shteteve të Bashkuara të Amerikës për të diskutuar për çështjen e Asociacionit, është një mesazh dhe sinjal shqetësues.

E kishin pase pyet njërin, o Bac, kush vetet në shpinë tuaj më së shumti, e ai i përgjigjet, të gjithë ngapak, veç Baci hiç.

Kryeministri, argumentet duhet t’i shtrojë në tryezën e diskutimeve. Edhe Jo-në e Zajednicës (Asociacionit), si njërën nga kauzat me të cilat ka ardhur në pushtet, duhet thënë aty.

Janë dy rrugë, të sigurohen numrat e shfuqizohen marrëveshjet, ose fillon procesi i zbatimit të tyre siç ka thënë Gjykata Kushtetuese e qysh po deklarohen partnerët tanë që asociacioni nuk e zhbën karakterin unitar të Kosovës.

Kryeministri duhet të dëshmohet më burrështetas se sa kaq. Raportet me ShBA-në janë çështje jetike për qenien tonë. Ato duhet t’i ruajmë si sytë e ballit!/arbresh.info/