Kryetari i NISMA-s, Fatmir Limaj, ka përkujtuar sot 27-vjetorin e rënies heroike të komandantit të Brigadës 113 të Zonës Operative të Drenicës, Mujë Krasniqi – Kapuçi, dhe 41 bashkëluftëtarëve të tij, të rënë në kufirin shqiptaro-shqiptar.

Në një postim në Facebook, Limaj theksoi se Mujë Krasniqi ishte ndër celulat e para të Ushtrisë Çlirimtare të Kosovës dhe një nga komandantët më të shquar të UÇK-së, duke nënvizuar kontributin e tij vendimtar në luftën për liri, shkruan Arbresh.info

Ai shtoi se në këtë përvjetor kujtohet me pietet të lartë jeta dhe vepra e komandant Kapuçit, ndërsa vuri në pah se e njëjta datë shënon edhe përvjetorin e formimit të Ushtrisë së Kosovës.

“Muja dhe të gjithë dëshmorët e Kombit janë më meritorët për lirinë të cilën sot e gëzojmë,” ka shkruar Limaj, duke i quajtur sakrificat e tyre themelin e shtetësisë dhe sigurisë së Kosovës.

Në fund, kryetari i NISMA-s u shpreh me nderime të larta për të rënët: “Lavdi jetës dhe veprës së Mujë Krasniqit dhe bashkëluftëtarëve të tij të rënë para 27 vitesh, lavdi të gjithë dëshmorëve të Kombit.”/Arbresh.info