Dy ditë më parë, Lidhja Demokratike e Kosovës kishte refuzuar të intervistonte një kandidat për ambasador të propozuar nga Qeveria e Kosovës
Duke e konsideruar si proces të paligjshëm dhe me shumë shkelje, kryetarja e këtij komisioni, Vjosa Osmani, së bashku me anëtaren tjetër të LDK-së, Doruntinë Malokun, kishin refuzuar të merrnin pjesë në këtë mbledhje.

LDK-ja thotë se nxitimi për të emëruar një ambasador për një shtet si Gjermania tregon se emërimi është politik.

Por nënkryetarja e Komisionit për Punë të Jashtme nga radhët e Aleancës për Ardhmërinë e Kosovës, Time Kadrijaj, deklaron se mbledhja e së martës, ku u intervistua një kandidat për ambasador, përfundoi me rekomandime pozitive.

Sipas saj, nuk është fare punë e komisionit vlerësimi i kuotës dhe çështjet e tjera, për të cilat LDK-ja refuzoi të ishte pjesë e këtij intervistimi.

Ndonëse nuk e mohon se gjatë qeverisjes së LDK-së kishte emërime të tilla politike, Naser Rugova thotë se LDK-ja do të vazhdojë të bojkotojë emërime të tilla, pasi që këto lidhen direkt me imazhin e vendit.

Ndërkohë, MPJ-ja ua ka dërguar dekretet për kthim 9 ambasadorëve në detyrë në vendet ku ata kanë shërbyer.