Drejtoria për Siguri dhe Emergjenca e Kryeqytetit ka ndërmarrë një intervenim të menjëhershëm për largimin e katër veturave që ishin të parkuara në lagjen “Velania”, pranë një grope ndërtimore, të cilat paraqisnin rrezik potencial për rrëshqitje.

Kështu bëri të ditur kryetari i komunës, Përparim Rama në një postim në Facebook.

Ai tha se veprimi është realizuar në mënyrë të koordinuar dhe të sigurt, duke mbyllur përkohësisht rrugën e dëmtuar me shirita sigurie dhe duke vendosur sinjalizime përkatëse afër rrethojave të kantierit ndërtimor.

“Në vendin e ngjarjes kanë qenë të pranishëm, Policia e Kosovës, Brigada Profesionale e Zjarrfikësve (BPZ), Kompania për Intervenime Emergjente e Drejtorisë për Siguri dhe Emergjenca, pronarët e veturave si dhe përfaqësuesi i kompanisë ndërtimore.
Të gjitha veprimet janë realizuar me prioritet të sigurisë së qytetarëve dhe të ambientit përreth.”, ka shkruar ai./Arbresh.info/