Kryetarja e Alternativës, Mimoza Kusari-Lila po merr pjesë sot në Forumin e Barazisë Gjinore, pjesë e Procesit të Berlinit, e cila mbahet në Sarajevë.

Me anë të një postimi në Facebook, Kusari-Lila tha se gratë nga gjashtë shtetet e Ballkanit Perëndimor bashkë me përfaqësues të Gjermanisë dhe Mbretërisë së Bashkuar diskutojnë për sfidat dhe mundësitë drejt shoqërive më të barabarta.

“Titulli i konferencës “Drejt Shoqërive të Barabarta: Barazia gjinore si shtytës i procesit rajonal” na kujton se barazia gjinore nuk është vetëm çështje drejtësie, por edhe forcë që nxit zhvillim, paqe dhe integrim rajonal. Nga Kosova jemi të përfaqësuara me diversitet e përkushtim – deputete, përfaqësuese të pushtetit lokal, shoqërisë civile dhe Agjencisë për Barazi Gjinore. Bashkë zëri ynë bëhet më i fuqishëm për një rajon më të drejtë dhe gjithëpërfshirës”, ka shkruar Kusari-Lila./Arbresh.info