Kurti uron ambasadoren franceze në Kosovë dhe gjithë popullin me rastin e Festës Kombëtare

12:32 | 14 Korrik 2020
A. B.

14 korriku është Festa Kombëtare e Francës.

Ish kryeministri i Kosovës, Albin Kurti me rastin e kësaj feste ka shkruar një postim në rrjetin social Facebook, shkruan portali arbresh.info

Kurti ka thënë se Festa Kombëtare e Francës nuk festohet vetëm në Francë por në të gjithë botën për shkak të rëndësisë që bart, si ngjarje historike.

Postimi i tij i plotë në Facebook:

Sot është 14 Korriku, Festa Kombëtare e Francës e cila nuk festohet vetëm në Francë por në të gjithë botën për shkak të rëndësisë që bart, si ngjarje historike. Me datë 14 korrik 1789 përplot qytetarë të shpronësuar, të varfër e të bashkuar me punëtorë e ushtarë, kryen një sulm mbi burgun e Bastijës ku po mbaheshin të burgosurit politikë të regjimit monarkik absolutist, për t’i dhënë kështu shkëndijën e parë fundit të feudalizmit në Francë, por edhe në vende të tjera që ndoqën këtë përpjekje për liri.

Është kjo datë që shënon aktin më të lartë të epopesë së modernitetit që edhe sot na kujton se beteja për liri, barazi e solidaritet mes njerëzve të thjeshtë kundër shtypjes, shfrytëzimit dhe padrejtësive të një pakice ndryshon për të mirë kursin dhe rrjedhjën e historisë. Ky revolucion ka frymëzuar e vazhdon ta mbajë lart shpirtin te subjektet progresiste e emancipuese në botë, e që rrezatoi edhe mbi luftën e popullit tonë drejt lirisë. Me këto ideale në mendje, për të cilat Francës i është mirënjohës mbarë njerëzimi, dëshiroj t’i uroj ambasadores franceze në Kosovë dhe gjithë popullit e institucioneve franceze, gëzuar Festën Kombëtare! / arbresh.info/