Kryeministri në detyrë i Republikës së Kosovës, Albin Kurti, priti sot në takim Apostullin Dr. Eric Kwabena Nyamekye nga Republika e Ganës.

Kryeministri Kurti i uroi mirëseardhje në Kosovë, teksa i shprehu mirënjohjen për interesimin për thellimin e bashkëpunimit ndërmjet Republikës së Kosovës dhe Republikës së Ganës.

Ai theksoi zhvillimin demokratik, shoqëror dhe ekonomik të Republikës së Kosovës, si dhe angazhimet e Qeverisë për ruajtjen dhe promovimin e vlerave demokratike, dimensionit shumëkulturor dhe bashkëjetesës fetare, si elemente të rëndësishme për zhvillimin e shoqërisë.
Gjithashtu, nënvizoi përkushtimin për ndërtimin dhe forcimin e urave të bashkëpunimit dhe komunikimit me Republikën e Ganës dhe me vendet e Afrikës. Ai shprehu gatishmërinë për avancimin e mëtejmë të bashkëpunimit në fushat e kulturës, dialogut ndërfetar dhe zhvillimit ekonomik.

Apostulli Dr. Eric Kwabena Nyamekye, Kryetar i Kishës së Pentekostit në Akra të Ganës, po qëndron për herë të parë në vizitë në Kosovë, me rastin e pjesëmarrjes në Konferencën e Parë Ballkanike të Kishës së Pentekostit, e cila u mbajt në Prishtinë.