Kryeministri i vendit, Albin Kurti tha se salla “Marjan Kozina” e Filharmonisë së Sllovenisë sonte frymoi në gjuhën shqipe.

Me anë të një postimi në Facebook ai tha se zëri i Korit të Filharmonisë së Kosovës, me një program të veçantë me përmbajtje kryesisht veprash shqipe me emra si Antoni, Rudi, Mengjiqi, Jashari, Tole dhe Syla, kumboi fuqishëm nën dirigjimin e maestro Baki Jasharit.

“Jashari ka kaluar më shumë se 20 vjet jetë me veprimtari muzikore në Slloveni. Rikthimi i tij në Lubjanë, sa ishte emocionues, aq ishte edhe mbyllje e një cikli të karrierës së jashtëzakonshme prej dirigjenti pas pensionimit të tij këtë vit.”, ka shkruar Kurti.

Kryeministri Kurti theksoi se pas koncertit, në një pritje të organizuar nga Ambasada e Republikës së Kosovës, takuan diplomatë të shumtë, komunitet shqiptar që jetojnë në Slloveni, dhe miq e dashamirë të Republikës së Kosovës./Arbresh.info/