Albin Kurti ka votuar sot, me rastin e zgjedhjeve të brendshme të Lëvizjes Vetëvendosje.

Kurti u deklarua për media, duke thënë se shpreson që të gjithë anëtarët e Lëvizjes Vetëvendosje të votojnë dhe të zgjedhin udhëheqje të mira në strukturat ekzistuese.

Po ashtu, Kurti tha se pret që mësimi të fillojë sa më parë, sipas tij, sindikalistët e PAN-it kanë inat antiqeveritar.

” Jam i bindur që nxënësit duan të shkojnë në shkollë, jam i bindur që prindërit duan që fëmijët e tyre të shkojnë në shkollë, jam i bindur që edhe mësimdhënësit duan të japin mësim nëpër shkolla. Këtë bindje ka edhe qeveria. Nuk duam që të bojkotohet shteti, sepse shkolla është shteti. Është për të ardhur keq se si shkollimi në Kosovë po mbahet peng. Për përshtypjen time të fuqishme, në të gjitha takimet që kemi pasur, bëhet fjalë për një lloj inati antiqeveritar… prej sindikalistëve të PAN-it, të cilëve iu është ndalur sahati më 5 qershor 2017. Aty u ka ngelur sahati sindikalistëve të PAN-it. E tash dëshirojnë që t’ia bëjnë një shërbim PAN-it në opozitë, duke e bërë grevën armë kundër qeverisë”, tha kryeministri./arbresh.info/