Kryeministri i Republikës së Kosovës, Albin Kurti, po qëndron në vizitë zyrtare në Davos të Zvicrës në margjinat e Forumit Ekonomik Botëror për një takim të udhëheqësve të Ballkanit Perëndimor.

Nga atje, Kurti përmes një postimi në Facebook, ka bërë të ditur se ka takuar zëvendës Presidenten e Zvicrës, Viola Amherd dhe Ministrin e Ekonomisë së Zvicrës, Guy Parmelin, raporton arbresh.info.

“Në Davos takova Zëvendës Presidenten e Zvicrës, Viola Amherd dhe Ministrin e Ekonomisë së Zvicrës, Guy Parmelin. U shpreha mirënjohjen e thellë për kontributin e Zvicrës dhënë për Kosovën. Theksuam rëndësinë e mërgatës sonë në Zvicër, që janë urë lidhëse mes dy shteteve tona”, shkruan Kurti.

Kurti bëri të ditur se në këtë forum ka takuar edhe kryeministrin e Republikës së Kroacisë, Andrej Plenkoviq, me të cilin kanë potencuar se me Kroacinë, Republika e Kosovës ka të përbashkët të kaluarën, por edhe të ardhmen brenda Bashkimit Evropian dhe NATO-s.

“Takova edhe përfaqësuesin e Posaçëm të Bashkimit Evropian për Dialogun Kosovë-Serbi, Miroslav Lajčák. Biseduam për hapat e mëtejmë dhe nevojën për dinamizim të procesit të dialogut drejt normalizimit të plotë të marrëdhënieve ndërmjet Kosovës dhe Serbisë, me njohje reciproke në qendër. Ndërsa me Zëvendëskryeministrin e Ukrainës dhe Ministrin e Transformimit digjital, Mylkhailo Fedorov dhe Administratoren e USAID-it, Samantha Poëer, në Shtëpinë e Ukrainës në Davos diskutuam mbi transformimin digjital”, shkruan Kurti./arbresh.info/

LEXO EDHE

Liderët e Ballkanit Perëndimor mblidhen për të diskutuar në Davos – Arbresh.info