Kryeministri i Kosovës, Albin Kurti e ka quajtur Kosovën storie të dyfishtë suksesi në Forumin Strategjik të Bledit.

Në një panel diskutimi, së bashku me liderët e tjerë të rajonit, përfshirë kryeministrin nikoqir, Robert Golob, Kurti ka thënë se po punohet vazhdimisht që Kosovën ta njohin edhe pesë shtetet e BE-së, të cilat nuk aktualisht nuk e njohin Kosovën, raporton Ekonomia Online.

Sipas Kurtit, përveç mënyrës diplomatike për njohje, mënyra tjetër për t’i bindur shtetet “skeptike” është përmes progresit si shtet.

“Pesë nga 27 shtete të BE-së nuk e njohin Kosovën akoma, Greqia, Sllovakia, Romania, dhe Spanja e Qipro.  Po punojmë me ta në mënyrë bilaterale dhe diplomatike, gjithashtu edhe në Bruksel”.

“Atmosfera mes nesh dhe këtyre shteteve është më e mirë se më parë. I kemi ca hapa të vegjël konkretë dhe në këtë mënyrë që t’i bashkohen shumicës së shteteve të BE-së që na njohin ne”.

“Një mënyrë tjetër se si po mundohemi t’i bindim shtetet që akoma janë skeptike është përmes progresit si shtet. Kosova është storie e dyfishtë e suksesit, storie e suksesit të intervenimit të NATO-s në 1999tën për ta ndalur gjenocidin e Milloshevoiqit dhe të Serbisë në atë kohë dhe e demokracisë e ekonomisë”.

“Bazuar në raportet e Transperancy International, Freedom House, Kosova është në krye të shteteve të Ballkanit në luftimin kundër korrupsionit dhe sundimit të ligjit, pra jemi optimistë sa i përket njohjeve”, ka thënë Kurti.