Më 28 dhe 29 gusht do të mbahet në Slloveni konferenca ndërkombëtare e Forumit strategjik të Bledit, e cila është konferenca në Evropën Qendrore dhe Juglindore.

Në këtë konferencë dy ditore do të marrë pjesë edhe kryeministri i Kosovës, Albin Kurti ashtu si dhe kryeministri i Shqipërisë, Edi Rama.

Siç shkruan Euronews.al, kjo do të jetë përballja e parë e dy kryeministrave pas debateve në distancë gjatë muajve të fundit, që pas anulimit të mbledhjes së dy qeverisë më 14 qershor në Gjakovë, përcjell Arbresh.info.

Nga rajoni, pjesëmarrës në këtë konferencë do të jetë edhe kryeministri në detyrë i Malit të Zi, Dritan Abazoviç ashtu si dhe ministri i Jashtëm i Maqedonisë së Veriut, Bujar Osmani.

Pjesë e kësaj konference do të jenë edhe i dërguari special i BE-së për dialogun Kosovë-Serbi, Miroslav Lajçak dhe presidenti i Këshillit Europian, Charles Michel

Konferenca është një mbledhje e pjesëmarrësve nga fusha të ndryshme duke shkëmbyer pikëpamje dhe ide për të adresuar sfidat e tanishme dhe sfidat e së ardhmes.