Kryeministri i Republikës së Kosovës, Albin Kurti, priti dje në takim Ambasadorin e Gjermanisë në Kosovë, Rainer Rudolf.

Ambasadori Rudolf e uroi Kryeministrin për mandatin e ri qeverisës dhe i dorëzoi letrën e urimit nga Kancelari gjerman, Friedrich Merz.

Në letër urim, kancelari Merz ndër të tjera shprehet: “Më gëzon fakti, që së bashku me ju do të thellojmë edhe më tej marrëdhëniet e ngushta dhe miqësore mes vendeve tona”.

Në takim u diskutua për thellimin dhe zgjerimin e mëtejmë të marrëdhënieve dypalëshe gjatë mandatit të ri qeverisës per rritjen e bashkëpunimit ekonomik dhe shtimin e investimeve.

Gjermania është ndër partnerët kryesor tregtar të Kosovës. Kryeministri Kurti nënvizoi prioritetet e qeverisë dhe investimet kapitale të planifikuara në këtë mandat, të cilat do t’i japin hov zhvillimit ekonomik.

Në takim u bisedua edhe për tema të tjera me interes të përbashkët, duke përfshirë bashkëpunim në fushën e sigurisë dhe mbrojtjes./Arbresh.info