Me rastin e shënimit të 26-vjetorit të rënies heroike të profesorit të Historisë, Selim Berisha, Kryeministri i Republikës së Kosovës, Albin Kurti, i shoqëruar nga Ministri i Shëndetësisë, Arben Vitia, sot bëri homazhe dhe vendosi kurora me lule të freskëta pranë varrit të profesor Selim Berishës, në varrezat e fshatit Barilevë-Drenoc, të Prishtinës.

 Në përkujtim të figurës së shquar të profesorit Berisha, kryeministri Kurti tha se edhe pse jemi me pikëllim dhe dhembje që prof. Berisha nuk është në mesin tonë fizikisht, është nder e krenari të kujtojmë jetën, veprën dhe rënien heroike të tij.

 “Si profesor i historisë u bë edhe vetë pjesë e historisë së popullit tonë, me rezistencën e qëndresën e tij, në një luftë të pabarabartë, në një betejë në të cilën dha gjithçka nga vetja e tij me armë në dorë, duke u përballur me forcat armike të Serbisë që po bënin krime e mizori ndaj popullsisë civile”, u shpreh kryeministri.

Ai shtoi se gjaku i dëshmorëve dhe i martirëve janë themelet e shtetit të Kosovës, kurse neve na përket një pjesë e punës që ka të bëjë me forcimin e shtetit, mbrojtjen e territorit, kulmin e sigurt, gardhin e tokës sonë stërgjyshore dhe se pikërisht dëshmorët dhe martirët janë ata të cilët vazhdojnë të na e ndriçojnë rrugën për këtë detyrë të shenjtë që kemi të gjithë ne bashkë dhe secili prej nesh. 

 Lavdi profesor Selim Berishës dhe gjithë dëshmorëve e martirëve të kombit shqiptar!

Deklarimi i plotë i kryeministrit Kurti:

 Mirëdita të gjithëve.

 Është për neve pikëllim e dhembje që nuk e kemi profesorin Selim në mesin tonë fizikisht, por gjithashtu është edhe nder e krenari të kujtojmë jetën, veprën dhe rënien heroike të profesor Selim Berishës.

Si profesor i historisë u bë edhe vetë pjesë e historisë së popullit tonë, me rezistencën e qëndresën e tij, në një luftë të pabarabartë, në një betejë në të cilën dha gjithçka nga vetja e tij me armë në dorë, duke u përballur me forcat armike të Serbisë që po bënin krime e mizori ndaj popullsisë civile.

Duke u përkulur para dëshmorëve dhe martirëve të kombit, ne ia përkujtojmë vetes se sa i lartë ishte çmimi që ka paguar populli ynë me bijtë dhe bijat më të mira të vetat për lirinë të cilën e gëzojmë sot dhe për zhvillimin e përparimin të cilët i ndërtojmë bashkë.

Gjaku i dëshmorëve dhe i martirëve janë themelet e shtetit të Kosovës, por neve na përket një pjesë e punës që ka të bëjë me forcimin e shtetit, me mbrojtjen e territorit, me kulmin e sigurt, me gardhin e tokës sonë stërgjyshore dhe pikërisht dëshmorët dhe martirët janë ata të cilët vazhdojnë të na e ndriçojnë rrugën për këtë detyrë të shenjtë që kemi të gjithë ne bashkë dhe secili prej nesh.

Lavdi profesor Selim Berishës dhe gjithë dëshmorëve e martirëve të kombit shqiptar!