Kryetari i Preshevës, Shqiprim Arifi ka komentuar vendimin e Kosovës për masën e reciprocitetit me Serbinë sa i përket targave.

Ai ka publikuar një fotografi në Facebook, derisa shihet në kufi duke mbuluar stemën e Serbisë në targat e veturës.

Arifi ndërkaq ka kujtuar se nxënësit shqiptarë në Luginën e Preshevës obligohen që në ditën e parë të shkollës ta këndojnë himnin serb.

“Reciprociteti me targat në zbatim, ndërkohë nxënësit shqiptarë në Luginë të Preshevës, në ditën e parë të shkollës, obligohen të intonojnë himnin kombëtar të Serbisë “Bože Pravde”!”, ka shkruar Arifi.

I pari i Preshevës, njoftoi të mërkurën se nxënësit shqiptarë në Luginë janë të detyruar ligjërisht nga autoritetet serbe të intonojnë himnin serb në ditën e parë të shkollës.

Arifi publikoi një dokument, që sipas tij, pasqyron vendimin për detyrimin e intonimit të himnit serb “Boze Pravde” në shkollat shqiptare të Luginës së Preshevës.