Bordi i përkohshëm i KEK-ut përmes një deklarate tha se është shokuar qysh nga takimet e para në këtë korporatë kur është njoftuar se KEK-u ka një diskrepancë prej mbi 1000 punëtorëve më pak se sa janë paraparë me skemën në fuqi.

Kryetari i komunës së Obiliqit Xhafer Gashi është ankuar jo rrallë herë për ato që i ka quajtur diskriminime ndaj qytetarëve të kësaj komune për punësim në KEK.

Ai beson se 1000 vendet e lira të punës në KEK janë pasojë e keqmenaxhimit.

“Nuk e di pse ka ndodhur, besoj së është një keqmenaxhim. Obiliqi është zonë që degradohet nga çështja ambientale dhe 72 për qind e territorit të komunës tonë shfrytëzohet për prodhimin e energjisë”.

Ai në Edicionin Special në Klan Kosova ka thënë se është manipuluar me banorët e Obiliqit kur iu është premtuar se të paktën një anëtar i familjes mund të punësohet në KEK në këmbim të dhënies së pronës së tyre për shfrytëzim nga KEK-u.

“Unë dyshoj që mund të jetë edhe mbi 1000 numri i vendeve të lira në KEK, pasi mosha mesatare e punëtorëve është bajagi e madhe. Vazhdimisht është manipuluar me qytetarët e komunës sonë, sidomos me zonat që janë shfrytëzuar për nxjerrjen e thëngjillit sidomos me Haden dhe Shipitullën”.

“Unë jam dëshmitar që shumë herë është negociuar edhe nga qeveria dhe menaxhmenti i KEK-ut, madje shumë herë janë përgatitur edhe lista që për shkak të marrjes së pronës të paktën një anëtar i familjes të punësohet në KEK, por kjo nuk ka ndodhur kurrë. Edhe pse janë dy vendime të qeverisë një gjë e tillë asnjëherë nuk ka ndodhur”.

“Unë mendoj që KEK-u në vazhdimësi ka pasë menaxhment të dobët dhe nuk ka përfillur kërkesat e qytetarëve, edhe pse në lokalet e tyre kanë premtuar se për dhënien e pronës dhe zhvendosjen e dhunshme nga lokaliteti të paktën një vend pune – që KEK-u nuk e ka bërë kurrë. Është debatuar në KEK dhe Zyrë të Kryeministrit, por s’ka ndodhur kurrë”.