Presidentja e Kosovës, Vjosa Osmani, kryeministri Albin Kurti dhe kryetari i Kuvendit, Glauk Konjufca, kanë bërë homazhe sot para pllakës përkujtimore të ushtarëve të rënë të NATO-s.

Para gazetarëve, presidentja Osmani tha se populli i Kosovës është përherë mirënjohës ndaj aleatëve perëndimorë që ndihmuan në çlirimin e Kosovës, për më tepër, edhe disa ushtarë dhanë jetën për të.

Kryeparlamentari Konjufca tha se për lirinë e Kosovës populli luftoi shumë dhe në fund arriti qëllimin shumëvjeçar të tyre.

Ndërsa kryeministri Kurti theksoi se në këtë ditë historike kujtohen të gjithë ata që janë munduar për lirinë e Kosovës, përfshirë humanizmin e Ibrahim Rugovës, qëndresën e Adem Demaçit dhe luftën e heronjve të UÇK-së, bashkë me ndihmën e NATO-s.

Sot janë bërë 24 vjet prej kur forcat e NATO-s hynë në Kosovë dhe ato serbe u larguan nga vendi, ngjarje që shënoi edhe çlirimin e Kosovës.