Kryetari i Partisë Demokratike të Kosovës, Memli Krasniqi, ka takuar Shefin e Misionit të Bashkimit Evropian për Sundimin e Ligjit në Kosovë, EULEX, Ambasadorin Lars-Gunnar Wigemark, me të cilin ka biseduar për zhvillimet politike në vend si dhe për angazhimin monitorues të këtij misioni në fushën e sundimit të ligjit.

Krasniqi përmes një postimi në Facebook ku ka njoftuar për takimin ka thënë se Kosova ka ndërtuar sistem të qëndrueshëm të drejtësisë të shtrirë në tërë vendin.

“Republika e Kosovës ka ndërtuar një sistem të qëndrueshëm të drejtësisë, strukturalisht të shtrirë në të gjithë vendin, profesionalisht në ngritje e sipër si dhe të vendosur mbi parime të qarta të një shteti të drejtë. Fuqizimi, mbështetja dhe profilizimi i mëtejmë i këtij sistemi, është detyrë e mision i përbashkët i të gjithë neve”, ka shkruar Krasniqi./arbresh.info/