Ish-kryeparlamentari Jakup Krasniqi në fjalën përfundimtare para Dhomave të Specializuara të Kosovës (DhSK), tha se për pesë vjet i janë shkelur të drejtat e tij themelore. Në veçanti, ai tha se i është shkelur e drejta për të jetuar në liri.

Në këtë rast, bashkë me Krasniqin, akuzohen edhe ish-Presidenti Hashim Thaçi, ish-kryeparlamentari Kadri Veseli dhe ish-deputeti Rexhep Selimi. Ata ngarkohen për krime lufte dhe krime kundër njerëzimit, raporton “Betimi për Drejtësi“.

Krasniqi tha se si një njeri në fazën e fundit të jetës, i është mohuar e drejta që të jetojë me familjen e tij në atdheun e tij të lirë.

“Për më shumë se pesë vjet besoj që më janë mohuar të drejtat e njeriut të garantuara nga Konventa Evropiane për të Drejtat e Njeriut dhe Liritë Themelore. Ndër to më e rëndësishme është e drejta për të jetuar në liri, veçanërisht e drejta e një njeriu në fazën e fundit të jetës së tij për të jetuara me dinjitet, pranë familjes dhe në atdheun e lirë”, tha ai.

Ai tha se kjo i është bërë pa i shkaktuar askujt padrejtësi dhe pa ia rrezikuar askujt jetën.

“Kjo më është bërë pa i shkaktuar padrejtësi askujt. Pa ia rrezikuar jetën asnjë njeriu të vetëm”, tha Krasniqi.

Një ditë më parë, në ditën kur Kosova shënoi 18-vjetorin e Pavarësisë, në Prishtinë u organizua një marsh, në të cilin morën pjesë mijëra qytetarë, për të kërkruar drejtësi për të akuzuarit e Speciales.

jala përmbyllëse e Prokurorisë filloi të hënën e 9 shkurtit 2026, dhe përfundoi një ditë më pas, më 10 shkurt, ku kryeprokurorja e specializuar, Kimberly West, kërkoi dënim unik me nga 45 vjet burgim për secilin nga katër të akuzuarit. Po më 10 shkurt u dha fjala përfundimtare edhe nga mbrojtësi i viktimave, Simon Laws.

Ndërsa, më 11 shkurt 2026, dha fjalën e tij përfundimtare mbrojtja e Hashim Thaçit dhe e filloi mbrojtja e Veselit, e vazhdoi edhe më 12 shkurt. Po atë ditë e nisi fjalën përfundimtare mbrojtja e Selimit dhe e përfundoi me 13 shkurt, datë në të cilën më pas i nisi deklarimet mbrojtja e Krasniqit. Kjo e fundit përfundoi deklaratat përmbyllëse më 16 shkurt, seancë e cila vazhdoi me pyetjet e trupit gjykues dhe përgjigjet e mbrojtjes dhe Prokurorisë.

Ndryshe, Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.

Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.

Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.

Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020.