Kosova pritet që shumë shpejt ta ketë operatorin e tretë të telefonisë mobile.

Ditë më parë, Bordi i Autoritetit Rregullativ të Komunikimeve Elektronike e Postare ka hapur konkurs për brez të ri frekuencor që nënkupton se janë hapur edhe procedurat për një operator të ri në Kosovë.

Ky operator është rezultat i marrëveshjes së arritur në Bruksel mes Kosovës e Serbisë në shtator të 2013-ës.

Por në Kosovë ka rezerva të shumta sa i përket futjes së një operatori të ri, e që parashihet që të jetë nga shteti i Serbisë, raporton KTV.

Visar Azemi, nga KOSID thotë se çdokush duhet të ketë të drejtë të konkurrojë në tenderin për operatorin e ri. Sipas tij, një marrëveshje politike nuk bënë të përcaktojë se kush do të jetë ai.

Deri tash janë dhënë shumë pak detaje për mënyrën e implementimit të kësaj marrëveshjeje.

Për shumë, ardhja e një operatori të ri parashihet se do të dëmtojë edhe më shumë Postën dhe Telekomin e Kosovës.

Para më shumë se një viti në Bruksel u arrit marrëveshja për telekomunikacionin mes Kosovës e Serbisë.

Operatori i ri vjen si kërkesë e kamotshme e Serbisë, e cila ka insistuar vazhdimisht se qytetarët serbë që jetojnë në Kosovë duhet të kenë telefoninë e tyre.

Megjithatë, prej përfundimit të luftës operatorë ilegalë të Serbisë kanë operuar në Kosovë, duke dëmtuar jashtëzakonisht shumë operatorët vendës./arbresh.info/