Anëtarësimi i Kosovës në Këshillin e Evropës nuk është përfshirë në agjendën e mbledhjes së Komitetit të Ministrave, i cili po mban punimet të martën dhe të mërkurën në Luksemburg.

Zëvendësministri në detyrë i Punëve të Jashtme, Kreshnik Ahmeti, ka konfirmuar se çështja e Kosovës nuk figuron në rendin e ditës së këtij takimi. Në një reagim në Facebook, ai tha se Kosovës po i vendosen padrejtësisht “kërkesa jozyrtare” si kusht për anëtarësim.

Ai theksoi se Asambleja Parlamentare e Këshillit të Evropës – organi që vitin e kaluar i dha dritën e gjelbër kërkesës së Kosovës për anëtarësim – është mekanizmi që përcakton nëse një shtet i ka përmbushur kriteret.

Sipas Ahmetit, Kosova s’ka asnjë pengesë ligjore për t’u anëtarësuar në Këshillin e Evropës, sikur secili shtet evropian.

“Megjithatë, procesi i anëtarësimit është i pakthyeshëm dhe institucionet e Republikës së Kosovës vazhdojnë komunikimin me shtetet anëtare, duke ecur me vendosmëri drejt anëtarësimit si shteti i 47-të i Këshillit të Evropës, sipas opinionit zyrtar të Asamblesë Parlamentare të kësaj organizate”, ka shtuar ai./Arbresh.info