Ish-ministri i Jashtëm i Kosovës dhe deputeti Enver Hoxhaj ka vizituar sot Katedralen “Nënë Tereza” në Prishtinë për të nderuar figurën e Papa Françeskut pas ndarjes së tij nga jeta.

Hoxhaj ka shkruar në librin e zisë të hapur nga Ipeshkvia e Kosovës dhe ka ndarë një mesazh ngushëllimi në rrjetin social Facebook.

“Sot shkrova në librin e zisë në Katedralen ‘Nënë Tereza’, në nderim të Papa Françeskut. Ai ishte zëri i paqes, i të varfërve dhe i humanizmit dhe përherë do të kujtohet si i tillë. Qoftë i përjetshëm kujtimi për të!”, ka shkruar Hoxhaj.

Papa Françesku, i njohur për përkushtimin e tij ndaj dialogut ndërfetar, mbrojtjes së të varfërve dhe promovimit të paqes globale, është vlerësuar gjerësisht edhe në Kosovë për mesazhet e tij të afërsisë dhe solidaritetit njerëzor./Arbresh.info/