Kryetari i Nismës Socialdemokrate, Fatmir Limaj, ka lënë të hapur mundësinë e një bashkëpunimi me Lëvizjen Vetëvendosje, duke paralajmëruar se formimi i një shumice parlamentare është çështje kohe.

Gjatë një konference për media, Limaj u pyet për deklaratat e kryeministrit në detyrë dhe njëherësh kreut të VV-së, Albin Kurti, lidhur me takimet që kanë zhvilluar mes vete.

Në përgjigje, Limaj u shpreh optimist për zhvillimet politike në vend dhe theksoi rëndësinë e shumicës parlamentare për funksionimin e institucioneve.

“E vetmja rrugë është shumica parlamentare, ashtu siç ka ndodhur gjithmonë në Kosovë. Partia e parë duhet ta ketë shumicën në Kuvend për t’i shtyrë përpara agjendat e veta – qoftë për zgjedhjen e Kryetarit të Kuvendit apo të Qeverisë. Besoj që Kosova do ta ketë shumicën parlamentare shpejt,” tha Limaj, duke qeshur ndërsa largohej nga konferenca./Arbresh.info/