Ministri i Punëve të jashtme, Behgjet Pacolli, ka pritur në takim ambasadorin e Hungarisë në Kosovë, László Márkusz.

Në kuadër të këtij takimi është diskutuar për riorientimin e bashkëpunimit ekonomik, me fokus të veçantë në nxitjen e shkëmbimit tregtar ndërmjet dy vendeve dhe atë të tregut të përbashkët të BE-së.

Kryediplomati kosovar ka shprehur gatishmërinë që Hungaria të jetë edhe më e pranishme në tregun kosovar, me synimin që të krijohen mundësi edhe për palën kosovare dhe veç kësaj të shikohen mundësitë e krijimit të partneriteteve të reja në mes dy vendeve në funksion tëarritjes së këtij qëllimi.

Poashtu, Pacolli ka vlerësuar mbështetjen e Hungarisë me kredinë e butë që i ka dhënë Kosovës dhe e cila synohet të investohet në projekte mjedisore.

Në margjina të këtij takimi, ambasadori hungarez e ka informuar Pacollin edhe për takimin e Ministrave të Jashtëm të Grupit të Vishegradit, që pritet të mbahet në Budapest.