Komiteti për Mbrojtjen e të Drejtave të Fëmijëve (KOMF) ka shprehur shqetësim për përdorimin e fëmijëve nga partitë politike në fushatën zgjedhore.

Sipas informacioneve dhe raportimeve të terrenit, në disa raste, fëmijët janë përfshirë në promovimin e subjekteve politike, një veprim që KOMF e konsideron shkelje të të drejtave të fëmijëve dhe shfrytëzim të tyre.

KOMF po ashtu i bën thirrje Komisionit Qendror të Zgjedhjeve që të monitorojë nga afër aktivitetet e subjekteve politike dhe në çdo rast të shkeljes së konstatuar të lidhur me shftytëzimin e fëmijëve si pjesë e fushatës elektorale, të ndërmarrë masa bazuar në legjislacionin në fuqi.

KOMF në të njëjtën kohë i bën thirrje edhe prindërve që të mos i politizojnë fëmijët, të mos i përfshijnë në asnjë formë në fushatë dhe të mos i marrin fëmijët me vete në aktivitetet të cilat organizohen nga partitë politike.

KOMF i bën thirrje mediave të cilat mbulojnë fushatën zgjedhore, që të ndërmarrin një rol aktiv në monitorimin e situatës dhe të bëjnë publike rastet ku fëmijët shfrytëzohen për qëllime partiake gjatë fushatës elektorale, gjithmonë duke mbrojtur identitetin dhe integritetin e fëmijës./Arbresh.info