Drejtori i Përgjithshëm i Policisë së Kosovës Kolonel Gazmend Hoxha është mirëpritur sot në takim në Tiranë nga Drejtori i Përgjithshëm i Policisë së Shqipërisë, Ilir Proda.

Policia e Shtetit njofton se vizita u zhvillua në kuadër të forcimit të bashkëpunimit ndërmjet dy policive, si dhe të shkëmbimit të eksperiencave dhe praktikave më të mira, përcjell Arbresh.info.

“Gjatë takimit drejtuesit e policive simotra u dakordësuan për një bashkëpunim tërësor dhe pa barriera, i cili duhet të kulmojë gjatë sezonit veror 2025. Gjithashtu, u dakordësua për shtim të skuadrave të përbashkëta hetimore dhe aksioneve të përbashkëta policore, të cilat do të rezultojnë me parandalimin dhe goditjen e trafiqeve të armëve, lëndëve narkotike dhe qenieve njerëzore”, thuhet në njoftim.

Pas këtij takimi, delegacioni i Policisë së Kosovës vizitoi ambientet e Njësisë Speciale “RENEA” dhe Forcës Kombëtare të Sigurisë, Njësia Tiranë.

“Delegacioni u mirëprit dhe u nderua nga drejtuesit dhe punonjësit e 2 njësive speciale. Këto vizita u realizuan për të parë nga afër organizimin, përvojën, si dhe metodologjitë e përdorura nga këto struktura të rëndësishme të Policisë së Shtetit, konkretisht: gjatë operacioneve të kërkim-shpëtimit, gjatë menaxhimit të situatave emergjente, si dhe gjatë operacioneve policore kundër terrorizmit dhe për rastet e pengmarrjeve”, thuhet në njoftim./Arbresh.info