Edhe pse zbatuan masa për parandalimin e virusit Covid-19, disa pjesëtarë të KFOR-it në Kosovë kanë dalë pozitivë me koronavirus, shkruan arbresh.info.

Sipas përgjigjes së zyrës për media brenda KFOR-it, thonë se gjendja shëndetësore e tyre është e mirë.

“Si pjesa tjetër e shoqërisë, disa nga personeli ynë kanë testuar pozitiv, por gjendja e tyre shëndetësore është e mirë. Secili ushtar i KFOR-it që tregon shenja të infektimit nga COVID-19 ose ka pasur kontakte me dikë të infektuar, vendoset në karantinën paraprake”, thonë nga zyra për arbresh.info.

Nëse ushtarët e KFOR-it infektohen, ata trajtohen nga objektet mjekësore në bazat e KFOR-it dhe futen në karantinë për të zvogëluar ekspozimin.

“Çdo komb kontribuues i KFOR-it është përgjegjës për evakuimin e personelit të vet dhe për aspektet e komunikimit të rasteve të tyre përkatëse”, thuhet në përgjigje.

Në aspektin e parandalimit, që nga fillimi i pandemisë COVID-19, KFOR ka zbatuar masa të kujdesshme bazuar në rekomandimet e Organizatës Botërore të Shëndetit, me qëllim zbutjen e rreziqeve për personelin e saj dhe për të gjitha komunitetet e Kosovës.

Masat e tilla zbatohen në të gjitha bazat dhe objektet e KFOR-it dhe përfshijnë masa të rrepta higjienike, ekzaminim dhe kontrolle të të gjithë personelit ushtarak të vendosur në zonë, kufizime të përkohshme në aktivitete jo thelbësore./arbresh.info/