Prokuroria Themelore në Pejë ka njoftuar se ka paraqitur kërkesë për caktimin e masës së paraburgimit prej 30 ditësh ndaj katër të pandehurve Xh.K., D.K., A.K. dhe L.Sh., nën dyshimin për kryerjen e veprës penale “Detyrimi”, sipas Kodit Penal të Republikës së Kosovës.

Sipas prokurorisë, më 23 korrik 2025, të pandehurit dyshohet se kanë kërcënuar seriozisht viktimën me qëllim përfitimi pasuror, duke i kërkuar fillimisht 20.000 euro, e më pas edhe 30.000 euro, në lidhje me blerjen e një patundshmërie. Ata janë arrestuar në flagrancë nga Policia e Kosovës, pas zbatimit të masave të veçanta hetimore.

“Gjithashtu, i pandehuri L.Sh. po dyshohet edhe për veprën penale “Mbajtja pa leje e armës””, thuhet në njoftim.

Prokurori i rastit ka bërë të ditur se në seancën paraprake do të kërkojë caktimin e paraburgimit për të gjithë të pandehurit.