Deputetja e AAK-së, Time Kadrijaj, e cila pak ditë më parë ka dorëzuar një kërkesë në Gjykatën Kushtetuese, përmes të cilën kërkon interpretim kushtetues mbi procedurat dhe zvarritjen për zgjedhjen e kryetarit të Kuvendit.

Kadrijaj ka thënë se presin nga Gjykata që lënda të trajtohet me seriozitet dhe të vendoset një afat kohë për konstituimin e Kuvendit, ashtu siç është e përcaktuar edhe për formimin e qeverisë.

“Kur e kam dorëzuar kërkesën në Gjykatën Kushtetuese, kam kërkuar të trajtohet me urgjencë lënda për shkak të bllokadës politike. Ndoshta është një rast unik që Gjykata mundet me i dhënë zgjidhje kësaj çështjeje, edhe për punën e trajtimit apo kohëzgjatjes se sa një parti politike ka të drejtë ta shfrytëzojë të drejtën e kandidimit të një kandidati edhe nëse nuk i merr votat, sepse mundet në pafundësi të bëjë bllokada të tilla. Kryeparlamentari votohet me një marrëveshje politike, me një koalicion politik. Asnjëherë nuk ka ndodh që kryetarin e Kuvendit ta votojnë partitë e tjera, që nuk kanë një marrëveshje politike. Kjo se çfarë po kërkon LVV-ja nuk ka sens. Nuk e kemi obligim ne me votu asnjë kandidat. Por, megjithatë ne e kemi dhënë një alternativë për hir të Kosovës dhe jo të LVV-së që të dalim nga bllokada politike. Shpresojmë që Gjykata Kushtetuese shpejt të kthejë një përgjigje. Por, shpresojmë se do t’i trajtojë me seriozitet çështjet ku kemi ngelë. Nuk i gjykoj vendimet e Gjykatës Kushtetuese, sepse ne i respektojmë, por ndoshta ta precizojë një afat kohor sikurse është për formimin e qeverisë” tha Kadrijaj për RTV21.

Deputetja Kadrijaj ka kritikuar edhe udhëheqësin e seancës konstituive, Avni Dehari.

“Ne kemi filluar një proces me votim të hapur, tash po kërkohet të kalohet në një proces të mbyllur, kjo po mendoj se është një lojë e LVV-së, sepse edhe po të votohet ai komision, ne si deputetë nuk do të marrim pjesë fare në votim dhe prapë rezultati do te jetë i njëjtë. Kjo është një lojë që po e përdor LVV-ja. Por edhe nëse votohet kryeparlamentari, LVV-ja do të bëhet lojë edhe me zgjedhjen e nënkryetarëve të Kuvendit”, theksoi ajo.