Inspektorati Policor i Kosovës ka njoftuar se hetuesit e këtij institucioni kanë rekomanduar suspendimin e një zyrtareje policore në Prishtinë.

Kjo rekomandim është bërë për shkak të dyshimeve se e njëjta mund të ketë kryer veprën penale “kanosje”. Policia e Kosovës është në pritje të vendimit përkatës në lidhje me këtë çështje.

“Rekomandimi është bërë bazuar në autorizimet ligjore të IPK-së në interes të hetimit të rastit.Informacionet e para lidhur me këtë rast hetuesit e IPK-së i kishin pranuar dje në orët e pasdites nga ankuesi fillimisht përmes telefonit”, njofton IPK.

Në komunikatë, IPK thotë se pas pranimit të informacioneve fillestare hetuesit e IPK-së kanë marrë një deklaratë nga ankuesi i cili ka përshkruar rrethanat e rastit.

“Hetuesit e IPK-së në koordinim me Prokurorin  kanë ndërmarrë disa veprime hetimore përderisa rasti vazhdon të trajtohet në procedurë të rregullt. Hetuesit e IPK-së pritet të ndërmarrin edhe veprime të tjera hetimore drejt ndriçimit të të gjitha rrethanave të këtij rasti”, përfundon njoftimi.