Organizata INPO ka publikuar një reagim lidhur me tenderin “Shërbime me ushqim (furnizim, përgatitje dhe servim) për nevojat e Policisë së Kosovës”, me vlerë të parashikuar 2.7 milionë euro, duke identifikuar një sërë shkeljesh ligjore dhe manovrimesh teknike që, sipas saj, rrezikojnë konkurrencën, barazinë dhe integritetin e prokurimit publik.

Sipas INPO-s, gjatë procesit të monitorimit, organizata ka zhvilluar komunikim të drejtpërdrejtë me Policinë e Kosovës, Ministrinë e Punëve të Brendshme dhe Komisionin Rregullativ të Prokurimit Publik, duke paraqitur prova dhe argumente për parregullsitë në dosjen e tenderit. Policia, sipas INPO-s, i ka mohuar të gjitha gjetjet dhe nuk ka treguar gatishmëri për korrigjime.

Ndërkohë, një operator ekonomik ka paraqitur ankesë në OSHP për afatin e tenderimit dhe kriteret teknike e financiare. INPO thotë se ka pritur vendimin e OSHP-së për të mos ndikuar në proces, ndërsa vendimi Nr. 2025-0984 i këtij institucioni ka konstatuar se Policia e Kosovës ka vepruar në kundërshtim me ligjin, duke urdhëruar anulimin e njoftimit për kontratë dhe korrigjimin e procedurës.

Sipas INPO-s, edhe pas këtij vendimi, Policia ka bërë vetëm disa korrigjime formale, ndërsa problemet kryesore të dosjes kanë mbetur të paadresuara. INPO liston si më të rëndësishmet:

keqklasifikimin e kontratës si “shërbime”, ndonëse mbi 70% e objektit janë furnizime ushqimore;

sistemin e peshimit të pikëve që, sipas tyre, krijon hapësirë për manipulim me çmime;

zhvendosjen artificiale të artikujve midis grupeve;

specifikime teknike me intervale të gjera që lejojnë produkte me cilësi të ulët;

uljen e vlerës së kontratës pa arsyetim profesional.

Sipas INPO-s, tenderi në formën aktuale rrezikon të prodhojë furnizime të dobëta, dëm ekonomik dhe cenim të cilësisë së shërbimeve ushqimore për Policinë e Kosovës.

INPO kërkon rishikim të plotë të dosjes së tenderit, duke theksuar se korrigjimet minimale nuk mjaftojnë për të garantuar konkurrencë të ndershme dhe përdorim të duhur të parasë publike.

INPO u bën thirrje KRPP-së dhe Prokurorit të Shtetit të ndërhyjnë, duke theksuar se shkeljet nuk janë thjesht teknike, por prekin integritetin e prokurimit publik dhe sigurinë ushqimore të një institucioni kyç të vendit.