Kryesuesi i Këshillit Gjyqësor të Kosovës, Nehat Idrizi ka thënë se KGjK-ja ka bërë gjithçka për të siguruar të dhënat e kërkuara në një periudhë të shkurtër kohore dhe për të siguruar të dhënat sa më të sakta që ishte e mundur për lansimin e raportit të vlerësimit të sistemit gjyqësor, shkruan arbresh.info.

Ai ka thënë se ky raport është mjaft interesant sepse ofron një qasje krahasuese të sistemit gjyqësor të Kosovës me të dhënat e 14 vendeve tjera.

“Dua të them se është një raport mjaft interesant dhe ofron një qasje krahasuese të sistemit gjyqësor bazuar në indikatorët konkret duke i krahasuar të dhënat mbi sistemin gjyqësor të Kosovës me të dhënat e 14 vendeve të tjera. Sikurse numri i gjyqtarëve por edhe numri i personelit të gjykatave, buxheti i alokuar për sistemin gjyqësor dhe buxheti për ndihmë juridike. Ky raport identifikon disa prej vështirësive kryesore me të cilat gjykatat po përballen që nga viti 2014. Tanimë është e rëndësishme të fillohet mbledhja e të dhënave të fundit duke përdorur metodologjinë  e njëjtë për të parë se si funksionojnë gjykatat”, ka thënë ai./arbresh.info/