Zëvendës kryeministri i Kosovës, Enver Hoxhaj ka marrë pjesë sot në hapjen e zyrës së RYCO-së në Prishtinë, së bashku me ministrin e Kulturës, Rinisë dhe Sportit, Kujtim Gashi, si dhe ambasadorët e Gjermanisë, Austrisë dhe Britanisë së Madhe.

Hoxhaj është shprehur i lumtur për hapjen e kësaj zyre, duke thënë se më në fund të rinjtë po e marrin rolin që iu takon në procesin për pajtim dhe bashkëpunim rajonal.

Megjithatë, Hoxhaj ka thënë se nuk mund të ketë pajtim ndërshoqëror nëse shteti i cili ka qenë burim i konfliktit nuk e ndryshon agjendën që e ka shkaktuar atë konflikt. Ai ka theksuar se parakusht themelor për pajtimin në Ballkan është njohja ndërshtetërore Kosovë Serbi.

“Sot u hap zyra e RYCO-së në Kosovë. Një kënaqësi e vërtetë të shohësh së si të rinjtë e Kosovës, bashkarisht me të rinjtë e vendeve të rajonit, tashmë po marrin rolin e tyre në bashkëpunimin rajonal dhe pajtimin në Ballkanin Perëndimor. Qeveria e Kosovës do ta mbështesë në çdo hap zyrën e RYCO-së në Prishtinë dhe zyrën qëndrore në Tiranë, në funksion të ecjes së sigurt drejt integrimit evropian për Ballkanin Perëndimor, por parakushti themelor për pajtim në Ballkan është njohja ndër-shtetërore Kosovë – Serbi”, ka shkruar Hoxhaj në llogarinë në Facebook.