Hoxha përshëndet përshpejtimin e procedurave për miratimin e dy projektligjeve të rëndësishme

16:21 | 23 Korrik 2018

Ministrja e Integrimit Evropian, Dhurata Hoxha, ka përshëndetur vendimin e deputetëve të Kuvendit të Republikës së Kosovës që me procedurë të përshpejtuar, kanë vënë në rend të ditës, Projektligjin për ratifikimin e marrëveshjes financiare IPA 2017, pjesa e parë, ndërmjet Kosovës dhe BE-së dhe Marrëveshja ndërmjet Kosovës dhe BE-së, për pjesëmarrjen e Kosovës në programin “Evropa për qytetarët”.

Ja postimi i plotë i Ministres Hoxha, në rrjetin social:

“Përshëndes vendimin e deputetëve të Kuvendit të Republikës së Kosovës, që sot me procedurë të përshpejtuar, kanë vënë në rend të ditës, Projektligjin për ratifikimin e marrëveshjes financiare IPA 2017, pjesa e parë, ndërmjet Kosovës dhe BE-së dhe Marrëveshja ndërmjet Kosovës dhe BE-së, për pjesëmarrjen e Kosovës në programin “Evropa për qytetarët”.

Miratimi i këtyre dy projektligjeve, ka rëndësi të madhe për qytetarët e Kosovës, sepse, kështu do të mundësohet që me IPA 2017, pjesa e parë, vendi përfiton 48 milionë euro, ku përfshihen 11 projekte të cilat do të ndihmojnë përafrimin me legjislacionin e BE-së, të drejtat e njeriut, efiçiencën e energjisë, ekonominë digjitale, sigurinë ushqimore si dhe përkrahjen për lidhjen më të mirë të arsimit me tregun e punës dhe politikat sociale.

Programi Evropa për qytetarët, përmban gjithsej 187 milion euro fonde që promovojnë qytetarinë aktive evropiane dhe si fokus ka autoritetet lokale, organizatat hulumtuese të politikave, grupet e qytetarëve dhe organizatat e shoqërisë civile. Programi zbatohet nëpërmjet thirrjeve për propozime, ku ftohen organizatat nga vendet e BE-së dhe vendet tjera që kanë qasje në program për të aplikuar.

Mund të kemi qasje në dy thirrje të cilat afatin e fundit për aplikim e kanë më 1 shtator të këtij viti si: Binjakëzimi i qyteteve (towntwinning); dhe Rrjeti i qyteteve (networkoftowns), të cilat iu dedikohen projekteve të përgatitura nga autoritetet lokale.

Shpërndaje në rrjete sociale

Lajmet më të lexuara