Në 26-vjetorin e themelimit të Policisë së Kosovës, deputeti i LDK-së, Avdullah Hoti, ka shprehur shqetësimin se pjesëtarët e këtij institucioni ende përballen me mungesë të mbështetjes institucionale dhe kushteve të nevojshme për punë.

Në një postim në Facebook, Hoti ka vlerësuar lart rolin e Policisë në ndërtimin dhe mbrojtjen e rendit dhe sigurisë, por ka kritikuar mungesën e përkujdesjes nga ana e shtetit.

Postimi i plotë:

Respekt dhe mirënjohje të jashtëzakonshme ndaj institucionit simbol dhe identitar të Republikës së Kosovës – Policisë.

Mirënjohje dhe përulje ndaj të gjithë atyre policëve që ranë në krye të detyrës dhe atyre që u lënduan në mbrojtje të jetës dhe pronës së qytetarëve.

Ndjehem keq që pas kaq vitesh shteti i Kosovës ende nuk ka arritur të ofrojë mbrojtjen e nevojshme për pjesëtarët e këtij institucioni, përfshirë këtu sigurimin shëndetësor dhe sigurimin e jetës, pensionin dinjitoz, të parakohshëm dhe të rregullt.

Është e papranueshme edhe fakti se ju mungojnë kushtet dhe mjetet e punës adekuate, siç janë: shujta e rregullt dhe e plotë, veshmbathje cilësore për verë e dimër, transport adekuat, vetura pune të përshtatshme dhe të mjaftueshme për të gjithë./Arbresh.info