Deklaratat e liderit të LVV-së, Visar Ymeri se bashkëpunojnë me një LDK tjetër dhe kjo veçanërisht duke ju referuar figurës së Isa Mustafa i hedh poshtë nënkryetari i LDK-së, Lutfi Haziri.
Haziri thotë se asnjë parti nuk mund të ketë komoditetin që të përzihet brenda partisë dhe figurave të një partie tjetër.

Ai për Rubikon të KTV-së ka thënë se këtë çmim janë duke e paguar tashmë nga partneriteti me PDK-në.

“Nuk ka bashkëpunim me kushte. Si të themi ne që bashkëpunojmë me AAK-në pa Ramush Haradinajn”, ka thënë Haziri.

Haziri nuk e konteston edhe postin e Mustafës në krye të partisë. Ai madje thotë se Mustafa duhet të ndjehet mirë ngase nuk e ka thyer marrëveshjen.

“Pavarësisht këtij procesi, Isa Mustafa nuk ka asnjë përgjegjësi që PDK nuk e ka mbajtur fjalën”, ka thënë ai.

“Ne nuk kemi asnjë emër tjetër sot”, ka thënë ai i pyetur nëse Isa Mustafa vazhdon të jetë kandidati i LDK-së për kryeministër.

LDK thotë Haziri është një dhe nuk bëhet fjalë për asnjë riformatim të partisë.