Në Dhomat e Specializuara në Hagë po zhvillohet sot seanca gjyqësore ndaj ish-krerëve të Ushtrisë Çlirimtare të Kosovës. Ish-presidenti i Kosovës, Hashim Thaçi, gjatë fjalës së tij para trupit gjykues, ka shprehur pakënaqësi për caktimin e seancës pikërisht më 28 Nëntor, ditë që shënon Festën e Flamurit dhe të Pavarësisë së Shqipërisë.

Thaçi tha se e mirëpret mbajtjen e seancës dhe se pjesëmarrja e tij dëshmon përkushtimin ndaj shtetit ligjor, por theksoi se vendosja e saj në një ditë të tillë kombëtare është “befasi jo e mirë” për çdo shqiptar.

“E mirëpres mbajtjen e kësaj seance, për këtë arsye jam edhe sot në këtë seancë, sepse jam i përcaktuar për respektimin e shtetit ligjor. Por i nderuari gjyqtar, se në këtë gjykatë, të mos ndodhin gjëra që nuk lejohen të ndodhin në shtetet të huaja përkatëse. Si çdo popull, edhe ne shqiptarët, i kemi traditat dhe vlerat kombëtare shtetërore. Caktimi i kësaj seance sot, më 28 Nëntor, do të duhej evituar. Për mua dhe çdo shqiptar është befasi jo e mirë. I nderuar gjyqtar, sot çdo shqiptar ka festë kombëtarë, shtetërore dhe familjare, sepse është festa e dinjitetit dhe krenarisë kombëtare, ku si çdo popull i lirë në botë feston dhe kujton. Sot çdo familje shqiptare, kujton dhe feston. Prandaj, mua nuk më mbetet tjetër, veç t’i uroj shqiptarët për festën e 28 nëntorit, të festojnë të bashkuar, krenarë dhe me dinjitet. Besoj që nëntorët e tjerë do t’i festojmë bashkërisht”, tha ai.