Kryetari i Aleancës për Ardhmërinë e Kosovës, Ramush Haradinaj, ka thënë se sigurimi i librave shkollorë nga prindërit do të jetë “luftë e vërtetë”.

Haradinaj, pas takimit me kryetarin e SBAShK-ut, Rrahman Jasharaj, tha se qëllimi kryesor i takimit ishte që të informohej rreth situatës me tekstet shkollore, e cila, sipas tij, është shumë shqetësuese.

Ai e ka quajtur kryeministrin Kurti dhe ministren Nagavci “të paskrupullt” për këtë vendim, duke shtuar se çështja e librave do të duhej të ishte e përfunduar që në pranverë.

Kreu i AAK-së, tha se ekziston mundësia që prindërit të mos i blejnë librat për shkak të vështirësive financiare e se ka komuna në vend që nuk kanë as librari.

“Si kryetar i Qeverisë e kam respektuar misionin e sindikatës, sot i gëzojmë disa të arritura, u fol për stazhin e mësimdhënësve”.

“Sot kam ardhur me dy qëllime; së pari të mësoj edhe më afër se si është gjendja tani me tekstet për shkak se informata që ne i kemi marr janë mjaftë shqetësuese. Për prindërit do të jetë një luftë e vërtetë për t’i siguruar këto tekste”.“Shumë prindër janë në vështirësi ekonomike dhe financiare dhe munden mos me i pasë prioritet tekstet, munden m’i shpenzua edhe në kërkesa të tjera. Nuk ka librari në të gjitha komunat”, u shpreh Haradinaj.

“Nuk e kuptoj edhe një herë po e quaj ashtu pafytyrësinë e Kurtit e të ministres të paktën një kërkim falje Kosovës. Kosova i paguan ata që në pranverë me e kry çështjen e teksteve për vjeshtë. Ata janë njerëz të paskrupullt, pa keqardhje dalin edhe tallen me të gjithë”, u shpreh Haradinaj.

Ai ka thënë se jo gjithmonë ka pasur takime të lehta e të mira me Jasharajn.

“Takimet me Sindikatën e Bashkuar të Arsimit nuk kanë qenë gjithmonë të lehta e të mira. Kujtoj takime që jemi përplasur në zyrën e Qeverisë, mirëpo edhe pas atyre përplasjeve e kemi respektuar njëri-tjetrin në përputhje me misionin qe kemi. Si rezultat i presionit të tyre direkt sot i gëzojmë disa të arritura. U fol për stazhin e mësimdhënësve në periudhën 91’-99’. Poashtu edhe tema të tjera”, ka thënë ai./eo