Deputeti nga Aleanca për Ardhmërinë e Kosovës (AAK), Daut Haradinaj, ka ngritur sot në seancën e Kuvendit të Kosovës çështjen e gjendjes së memorialit të Jasharajve në Prekaz.

Ditë më parë është raportuar se Kulla e Jasharajve, e cila është bërë muze, është në gjendje të rëndë dhe ekziston rreziku që ajo të shembet për shkak të moskujdesit nga ana e institucioneve.

Haradinaj tha të enjten se një ligj i cili qe miratuar në legjislaturën e kaluar, por që për shkak të shpërndarjes së Kuvendit ishte kthyer në pikën zero, të sillet sërish në Kuvend për t’u miratuar sa më shpejt që të jetë e mundur.

“Ka dy javë që kemi kërku që ky ligj të procedohet dhe amandamentohet sa më shpejt që ta marrë drejtimin e duhur dhe të zgjidhet ky problem. Por edhe një fakt, është e vërtetë që ka pasë fonde të ndara për këtë kompleks tash e sa vite. Ka pas një projekt të bërë prej arkitetit Përparim Rama para 8 viteve, e që ka mbetë në sirtar e nuk dihet ku është”, tha Haradinaj duke iu referuar një projekti të hartuar me qëllim të restaurimit të kësaj kulle.

“Raporti i Agjencisë për Mbikëqyrjen e Memorialeve, para dy viteve, më shumë është marrë se kush duhet me shpallë tenderin se në çfarë gjendje janë memorialet tona. Sa për informim, tash e kemi konkursin e ri, janë 3 muaj afat, ne si anëtarë do ta qesim në kuvend, e do ta zgjedhim”, tha Haradinaj.

“Në rast se nuk i marrim hapat urgjentisht ato objekte do të rrënohen për shkak të reshjeve të mëdha të shiut e një interesim nuk po duket në horizont”, shtoi ai.