Kryetari i Aleancës për Ardhmërinë e Kosovës (AAK), Ramush Haradinaj është takuar me ministrin e Jashtëm të Shqipërisë, Igli Hasani.

Gjatë takimit, Haradinaj ka vlerësuar angazhimin e qeverisë shqiptare në mbështetje të Republikës së Kosovës, në shumë çështje të rëndësishme, shkruan Arbresh.info.

Sipas tij, projekti i hekurudhës i inicuar në qeverinë tonë, që tani po bëhet realitet ndryshon epokën e shqiptarëve.

“Në këto etapa vendimtare kërkojmë mbështetjen e qeverisë shqiptare, tani në veçanti kur e dimë që Shqipëria udhëheq shumë iniciativa rajonale, siç është Karta e Adriatikut dhe disa të tjera. Ne, bashkërisht duhet të kemi pozicion sa më të qartë dhe më unik në raport me interesin kombëtar dhe të dy shteteve.”, ka shkruar Haradinaj pas takimit me Hasanin.

Ndër të tjera, kreu i AAK-së u shpreh se mbështetja e Shqipërisë është e rëndësishme është e rëndësishme në arritjen e proceseve  euro-integruese të Kosovës.

“Anëtarësimi i Kosovës në NATO mbetet synim kryesor i yni si shtet, si garancë për më shumë stabilitet në rajon e botë. Krahas mbështetjes së aleatëve tanë perëndimorë në krye me SHBA-të, roli i Shqipërisë është tejet i rëndësishëm në arritjen e këtij objektivi por edhe në proceset e tjera euro-integruese të Kosovës., përfundoi ai./Arbresh.info/